adagio sostenuto

షెల్లీ కుంచె పట్టుకుంటే గొప్ప ప్రకృతి చిత్రకారుడయ్యేవాడేమో
డావిన్సీ గీయకుండా వ్రాసి ఉంటే మోనాలిసా కావ్యమయ్యేదా?
రవీంద్రుడి కలల ఆర్తీభావం శిలలో మూర్తీభవించి ఉంటే
గీతాంజలి శిల్పాంజలి అయ్యేదేమో.
పికాసో బొమ్మ తన సోకాపి సోనెట్లు పాడితే
అది సొనాటా అవుతుందా.

మైకెలాంజెలో వ్రాసిన గేయం వర్డ్సువర్తు చెక్కిన శిల్పం
తాన్ సేన్ ఆడిన నాట్యం రవివర్మ పాడిన పద్యం-

అన్నట్టు చెప్పానా నీకు

నీ కళ్ళలోకి చూస్తూ
నీ శ్వాసకి ఆడే నా గుండెచప్పుడు ఆర్పేజియో
బీథోవెన్ మూన్ లైట్ ప్రవాహంలా
adagio sostenuto అవుతుందని.